MOP LANSA FATUK DAHULUK BA ESTRADA AILEU-LEKIDOE, KSOLOK BOOT BA POVU AILEU

MOP LANSA FATUK DAHULUK BA ESTRADA AILEU-LEKIDOE, KSOLOK BOOT BA POVU AILEU

Aileu, 27 Junnu 2023: Ministru Obras Públikas (MOP), Eng. Abel Pires da Silva, akompaña husi Ministru Edukasaun, Juventude no Desportu (MED), Sr. Armindo Maia, Administradór munisípiu Aileu, Sr. Abel da Conseição, lansa fatuk dahuluk ba projetu konstrusaun estrada husi kapitál munisípiu Aileu nian ba to’o postu administrativu Lekidoe no to’o iha estrada boot postu administrativu Remexiu (kruzamentu estrada boot ba Dili no Aileu nian) ne’ebé sei konstrui durante tinan ida ho balun.

Lansamentu ne’e nu’udar ksolok boot ida ba povu Aileu liu-liu ba komunidade postu administrativu Lekidoe inklui komunidade postu administrativu Remexiu tanba iha mandate VIII Governu Konstitusionál nian, Governu konsege lansa ona estrada munisipál ba postu rua ne’e.

“Ohin ita lansa estrada importante ida husi Aileu vila ba postu Lekidoe depois liu ba postu Remexiu sai ba estrada boot ne’e pruvolta de 26KM ho kustu millaun $24 resin, ida-ne’e preparasaun kleur ona, ita hanoin katak ita-nia inan-aman sira iha ne’e mós hein kleur ona dezde kedas tempu Indonézia i ohin ita konsege lansa tanba buat hotu kompletu tiha ona, ita hetan ona vistu husi Kámara de Kontas ne’e signifika katak laiha buat ida mak atu impede, buat hotu tuir dalan, tuir administrasaun, tuir lei, tuir regra, tuir ita-nia orsamentu hotu. Tanba ne’e mak ohin ita bele lansa i hein katak IX Governu tuir mai, Sábadu bele hetan pose ona, Governu foun bele kontinua obra ne’e to’o hotu tanba estrada ne’e importante ba ita-nia povu no ba ita-nia oan sira, no mós ita hatene Lekidoe postu ida ne’ebé mak produtivu tebe-tebes, iha Dili hotu-hotu han sabraka husi Lekidoe, ne’e di’ak ba povu, di’ak ba ema hotu”, Sr. Ministru informa ba jornalista sira iha administrasaun munisípiu Aileu nian, iha suku Aiserimou, postu Aileu vila, munisípiu Aileu.

Sr. Ministru mós husu ba komunidade afeitadu sira husi projetu refere atu kontribui másimu atu nune’e projetu ne’e bele finaliza tuir tempu ne’ebé determina ona.

Governante ne’e rekoñese katak iha duni informasaun balun kona-ba prosesu lansamentu estrada refere husi empreza balun maibé Sr. Ministru hatete projetu ne’e lansa tanba hetan ona vistu husi Kámara de Kontas, no laiha ona prosesu seluk mak Governu presiza kumpri tan, maibé presiza de’it mak lansamentu atu kompañia manán na’in COVEC bele hahú nia servisu konstrusaun.

“Favór ida apoiu, estrada ne’e ba ema hotu-hotu, husu apoiu ba ema hotu-hotu, husi parte hotu-hotu inklui ita-nia veteranu sira tanba sira-nia sakrifísiu uluk mak ita ohin ko’alia kona-ba dezenvolvimentu, tanba ne’e ita husu sira-nia apoiu nafatin, projetu ne’e finál ona, la’o tuir lei entaun ida-ne’e mak sei implementa ba oin,” Sr. Ministru hatete.

Iha intervensaun hafoin lansamentu estrada refere, Sr. Ministru hatete lansamentu estrada Aileu-Lekidoe nu’udar atividade ikus husi nia mandatu durante asumi kna’ar nu’udar Ministru Obras Públikas.

“Serimónia ida-ne’e hanesan serimónia ida ke boot, ha’u sente ida-ne’e hanesan mós despedida ida mai ha’u nu’udar Ministru Obras Públikas, Ohin mós hanesan ha’u-nia atividade públiku ikus hanesan Ministru, ne’ebé ha’u hakarak agradese ba parte hotu-hotu ne’ebé mak durante ne’e fó ona kontribuisaun liuliu tékniku sira iha ministériu nia-laran, onra boot ida mai ha’u, previleiju boot ida mai ha’u bele ona servisu hamutuk ho imi serví ita-nia povu no ita-nia rain”, Sr. Ministru agradese.

Sr. Ministru mós enkoraja funsionáriu MOP nian liuliu tékniku sira atu servisu maka’as liután hodi serví povu no nasaun, rekoñese katak durante ne’e hetan krítika oioin maibé hanesan funsionáriu sai ba liur tenke foti oin tanba, Sr. Ministru hatete, “ha’u hatene imi servisu maka’as, ha’u hatene imi la nonook, ne’ebé husik, públiku ninia papél mak atu krítika tanba ho krítika mak ita bele la’o maka’as, mais labele haluha imi servisu maka’as duni bai mi-nia rai no povu ida-ne’e, tanba ne’e kontinua servu ho di’ak, see de’it mak mai troka ha’u ata hanesan Ministru, favór ida apoiu tanba ita hotu hakarak buat di’ak ba ita-nia rai, ba ita-nia povu atu oinsá terus ne’ebé mak uluk ita-nia povu hetan, mate rihun ba rihun ne’ebé mak liu ona, ne’e tenke iha rezultadu, rezultadu maka moris di’ak ba povu”.

Iha fatin hanesan, Administradór munisípiu Aileu, Sr. Abel da Conseição, hatete lansamentu estrada refere nu’udar ksolok boor ba komunidade Aileu espesialmente ba postu Remeziu tanba la kleur tan sei asesu ba estrada.

“Ohin loron ksolok boot ida ba ita povu Aileu, buat ne’ebé mak ita hein, ohin nia to’o ona mai, habadak ona ita-nia ain, habadak ona ita-nia oras viajen ne’ebé ma khan tempu tebes, ohin ita hahú lansamentu ba estrada Aileu vila ba Lekidoe, no husi Lekidoe sei to’o bai ha Remexiu, esforsu lubuk ida ne’ebé ita halo, ohin realidade mosu mai”, Administradór ne’e hatete.

Sr. Administradór munisípiu ne’e mós husu ba komunidade, autoridade lokál no veteranu sira atu kontribui ba prosesu konstrusaun ba estrada refere atu nune’e bele finaliza tuir tempu ne’ebé iha hodi fasilita movimentasaun komunidade nian asesu ba merkadu.

Lansamentu estrada refere, partisipa mós husi Prezidente EDTL.EP no ANE.IP, Prezidente BTL.EP, husi ANLA, IJE.IP, Diretór Jerál no Nasionál sira husi MOP no MEJD, inklui tékniku sira.

Aliende ne’e, partisipa mós husi Komandu PNTL munisípiu Aileu, Amu Pároku, Veteranus, autoridade postuautoridade lokál, komunidade, lia-nain no estudante sira.

Projetu konstrusaun ba estrada refere sei hala’o durante fulan 18 nia-laran no retensaun fulan 12, ho nia orsamentu hamutuk millaun $24 resin no konstrui husi kompañia Internasionál COVEC.