KOMPAÑIA FORNESEDOR ENTREGA ONA TRANSFORMADÓR 40MWA BA MOP-EDTL, GARANTE FORNESIMENTU ENERJIA ELETRISIDADE BA KLIENTE IHA KAPITÁL DILI

Dili, 16 Maiu 2023: Ministru Obras Públikas (MOP), Eng. Abel Pires da Silva, iha Segunda-feira ne’e partisipa iha serimónia entrega no inagura transformadór 40MWA husi kompañia TBEA ba Eletrisidade Timor-Leste Empreza Públika (EDTL-EP) iha Sub-Estasaun Eletrisidade Kamea, Dili, hodi garante fornesimentu enérjia eletrisidade ba kliente liu-liu komunidade iha kapitál Dili.

“Ha’u mai iha ne’e dala barak ona, uluk mai fila-fila hanesan membru Parlamentu, Komisaun infraestrutura no iha momentu ne’eba ne’e hanesan Prezidente Komisaun, dala-barak mai ha’u preokupa tebes mak ba imi-nia kondisaun servisu, agora mai ho kondisaun seluk i hanesan Ministru Obras Públikas ne’ebé mak tau-matan duni ba área ida-ne’e ho apoiu servisu tomak husi ita-nia lideransa sira iha EDTL. Ha’u imi-nia belun di’ak para atu kria kondisaun ba imi servisu di’ak liután tanba instalasaun ida-ne’e instalasaun ida ne’ebé mak estratéjiku, krusiál ba ita-nia nasaun tomak, ahi laiha buat hotu paradu. Funsionamentu sosiedade ida modernu iha sékulu XXI ida agora ne’e asesu ba eletrisidade ne’e sai ona direitu umanu ida entaun ita-boot sira-nia servisu ne’e krusiál tebes,” Sr. Ministru Obras Públikas hatete bainhira inagura transformador ne’ebé instala ona iha Sub-Estasaun eletrisidade iha Kamea, Dili.

Sr. Ministru mós hatutan mensajen S. Exa, Primeiru Ministru ba tékniku EDTL tomak katak Xefe Governu kontenti tebes ho esforsu hotu ne’ebé ekipa EDTL halo para bele asegura nafatin fornesimentu enérjia eletrisidade ba komunidade iha teritóriu Timor laran tomak.

“Ohin ha’u hamriik dook tiha iha ne’eba tanba ha’u hetan telefone husi ita-nia S. Exa, Primeiru Ministru ha’u hato’o katak agora daudauk ne’e ita halo hela lansamentu, nia kontenti, nia mós fó komprimentus ba ita-boot sira hotu, parabéns mós bai ta-boot sira-nia servisu tomak. Ha’u hanoin S. Exa, Primeiru Ministru Jenerál Taur Matan Ruak kontenti teb-tebes ho ita-boot sira-nia esforsu tomak, husik situasaun defisíl ne’e ita mak infrenta, importante mak ita tane ita-nia S. Exa, Primeiru Ministru para depois lider históriku ida-ne’e kontinua serví ho hakmatek, la presiza tan rona problema ki’ik oan sira ne’e ba to’o iha nia”, Sr. Ministru hatete.

Sr. Ministru Obras Públikas agradese tebes bele halo inagurasaun ba transformadór ne’ebé instala ona iha sub-estasaun eletrisidade refere hodi serví ba nesesiade eletrisidade nian. Antes ne’e mákina ka transformador iha rua de’it mak iha sub-estasaun Kamea no kapasidade utilizasaun enérjia eletrisidade iha kapitál Dili barak, nune’e mákina tenke traballa hela de’it hodi fornese enérjia eletrisidade ba komunidade maibé ho instalasaun transformadór foun ne’e kapasidade fornesimentu enérjia ne’e si’ak liután.

Durante intervensaun iha serimónia inagurasaun transformadór ne’e, Sr. Ministru agradese ba servisu hamutuk entre Xina ho Timor-Leste, no esforsu tomak husi tékniku sira, ohin loron Sub-Estasaun Kamea bele iha tan transformafor foun hodi apoiu transformador tuan ne’ebé iha. Husu mós ba tékniku timoroan sira atu kontinua servisu maka’as no aprende nune’e iha futuru timoroan rasik bele halo operasaun ba sistema ne’ebé instala ona.

Iha fatin hanesan, Embaixadór Xina iha Timor-Leste, Sr. Xiao Jianguo, Xina prontu servisu hamutuk ho Governu Timor-Leste hodi kontribui iha área enérjia eletrisidade nian, no hein katak instalasaun transformador foun ne’e bele fornese enérjia eletrisidade ba komunidade ho di’ak liután.

Iha oportunidade ne’e EDTL.EP mós entrega sertifikadu rekoñesimentu ba kompañia TBEA ne’ebé implementa projetu ne’e no tékniku sira ne’ebé esforsu hodi finaliza projetu refere.

Serimónia inagurasaun ne’e partisipa husi Prezidente Autoridade Nasionál Eletrisidade (ANE.IP), Vogál sira husi EDTL.EP, funsionáriu no tékniku sira husi EDTL.EP nian, inklui husi kompañia fornesedór.