GOVERNU LIU HUSI MOP, INAUGURA PROJEITU ELETRIFIKASAUN IHA ALDEIA LEBANEI BAIRO TABERE, ALDEIA DEFADAE BASILIA

GOVERNU LIU HUSI MOP, INAUGURA PROJEITU ELETRIFIKASAUN IHA ALDEIA LEBANEI BAIRO TABERE, ALDEIA DEFADAE BASILIA

Dili, 18 Jullu 2025

Ministru Obras Públika, Samuel Marçal akompañia hosi Sekretariu Estadu Asuntu Toponímia no Organizasaun Urbana, Germano Santa Brites Dias, Prezidente Autoridade Munisipiu Baucau, Veneranda E. M. Lemos Martins, Prezidente Komisaun Ezekutivu EDTL,E.P., Paulo da Silva ho nia komitiva ofisialmente halakan eletrisidade iha aldeia Lebanei Bairo Tabere no aldeia Defadae, Munisipiu Baucau, Sexta-feira ne’e.

Antes tama ba serimonia inaugurasaun projeitu eletrifikasaun iha Suku Letemumo ho Suku Macalaco, Ministru Obras Públika ho nia komitiva simu ho serimonia kultura hosi ekipa moradores, ekipa tebedai no lia dadolin tuir lisan Suku Letemumo no Macalaco.

Iha nia intervensaun Ministru Obras Públika haktuir hafoin simu tiha posse iha loron 01 Jullu 2023, simu kedan orientasaun hosi Primeiru Ministru, Kay Rala Xanana Gusmão atu tau atensaun ba infraestrutura sira iha area rural mak hanesan Estrada, Bee mos no eletrisidade.

“Hafoin ha’u simu tiha posse iha loron 01 Jullu 2023, Primeiru Ministru, Kay Rala Xanana Gusmão fo orientasaun ba ha’u atu tau atensaun ba infraestrutura públiku sira iha area rural hanesan Estrada, bee mos no eletrisidade, ohin ita inaugura eletrisidade iha aldeia Lebanei, ne’ebe foin asesu ona eletrisidade ba futuru Governu hamutuk EDTL,E.P. sei foku liu atu implementa tan programa Timor Naroman iha aldeia sira ne’ebe seidauk asesu enerjia eletrika iha Postu Administrativu Quelicai”, hateten Ministru Obras Públika.

Ministru Obras Públika haktuir kona-ba uma kain 60 ne’ebe seidauk asesu eletrisidade husu ba sei tau ba ajenda hodi implementa iha tempu badak.

Prezidente Eletrifikasaun Nasional iha aldeia Lebanei, bairo Tabere, aldeia Defadae Suku Makalako implementa hosi kompañia “Montez ferere UNip,Lda” ho volume servisu instalasaun liña media tensaun 2km sirkuitu, liña baixa tensaun 9.9km sirkuitu, instalasaun transformador ho kapasidade 50kVA, benefisiariu hosi projeitu eletrifikasaun ne’e uma kain hamutuk 231.

Iha fatin hanesan Prezidente Autoridade Munisipal Baucau, Dr. Veneranda E. M. Lemos Martins hateten lori Postu Administrativu 8 nia naran no komunidade tomak hakarak agradese ba IX Governu Konstituisional liu hosi Ministeriu Obras Públika ne’ebe servisu maka’as hodi identifika infraestrutura ne’ebe povu presiza.

“Agradese ba portidaun kompañia ninian ne’ebe ho esforsu tomak ohin loron bele finaliza projeitu humanitariu ida ne’ebe fo benefisiu ba ema tomak. Ami mos hakarak hato’o katak la to’o  iha ne’e deit buat barak mak ami sei presiza hanesan munisipiu Baucau nian sei presiza nafatin Estrada rural no Estrada urbana, Bee moos, eletrisidade “ hateten PAM Baucau.

Autoridade Munisipal nafatin tau esperansa ba Ministeriu Obras Públika atu tau matan nafatin ba munisipiu Baucau espera iha tinan ida ne’e, ami bele sente katak Baucau sei tama iha prosesu avaliasaun ba kondisoens minimas ba desentralizasaun administrative no poder lokal.

Entretantu projeitu ida ne’e implementa hosi kompañia Montez Frere Unip,Lda ho orsamentu 4 mil resin ne’ebe konsege liga ba uma kain hamutuk 284.

Serimonia inaugurasaun projeitu eletrifikasaun ne’e marka prezensa mos Administrador Postu Administrativu Quelicai, Komandante PNTL munisipiu Baucau, reprezentante Komandante CFT, F-FDTL, Prezidente CCLN, Diretor Nasionais, Diretur Servisus Munisipais, APA Quelicai, Xefe Suku inklui mos komunidade sira.*

Mídia MOP